شنو أحسن طريقة باش تبدا؟
باغي تبدا دروبشيبينغ؟ عندك مشروع شحال و نتا كتفكر تبداه؟ شنو أحسن طريقة باش تبدا؟
"جمع راس المال"، "ادرس الحجم ديال السوق"، "قلّب على المنتوج" و "اتغلب على العقبات"، هادشي كامل مهم و جدير بالإهتمام، لكن تاحاجة من هادشي ما صعب من المشكل الأكبر: اللي هو تبدا.
خمسة ديال الأسباب (على الأقل) هي اللي مخلّياك مازال ما بديتي:
* التغيير صعيب و كايخلع، الإنسان بطبيعتو كَيعطّل أي حاجة لأطول فترة ممكنة.
* تا واحد ما كيبغي يفشل: أسهل طريقة باش ماتفشلش هي ما دّير والو (خاصة ايلا كان داكشي جديد عليك)
* تا واحد ما باغي يسمع : ايوا شفتي، كون فكّرتي مزيان قبل ما تبدا. داكشي علاش كاين اللي كيحصل فمرحلة البحث، و كيقلّب و كيسالي كاع المصادر و مزال كيقلّب. ايلا خلّيتيه عشر سنين، غتجي غتلقاه مازال كيقلّب و كيسوّل الناس.
* قنعتي راسك بلّي ما عندكش الفلوس الكافيين أو الموظفين… المهم نتا خايف تبدا المغامرة بلا مايكونو عندك الموارد، ياك؟ داكشي علاش قررتي تساين شي نهار، و تمّا بقيتي!
* الحياة، آه الحياة! الدّار الوليدات، الوقت، و منين غادي تجيب هاد الوقت باش تعلّم شي حاجة جديدة و تبدا!
هادشي كامل مزيان، من حقك تفكر بحال هاكا! ولكن خاصّك تعرف بلّي الحاجة يا بغيتي دّيرها يا ما بغيتيش! ايلا ماعندكش الرغبة، ما عندك والو واخا تكون مسالي و راس المال كاين ماغادي دير: والو!
كنقتارح عليك واحد الحل ساهل: شنو ماكان الهدف ديالك، بدا بخطوة صغيرة! و غادي تشوف شنو غيوقع.
ايلا جاك شي رد إيجابي: دير خطوة وحدة أخرى، ايلا كان الرد سلبي: حبس و فكر شنو تقدر تبدّل و شنو خاص تعلّم، و خد بعين الإعتبار داكشي اللي تعللمتي.
📝تعلّم، بني 🧱، عاود عاوتاني🔁.
هادا هو النمودج ديال رواد الأعمال الّي بداو شركات كبيرة من والو. هادي هي الطريقة الأكتر كفاءة و الأقل تكلفة باش تبدا شي حاجة جديدة.
ايلا كنتي باغي شي حاجة توقع، خود ديك الخطوة الصغيرة الاولى، واخا تبان ليك صعيبة و كاتخلع!
غير بدا!
Aucun commentaire:
Enregistrer un commentaire